Uzazi wa mpango baada ya utoaji mimba

HealthWiki > Pale ambapo Wanawake hawana Daktari > Sura ya 15: Utoaji mimba na matatizo yanayotokana na utoaji mimba > Uzazi wa mpango baada ya utoaji mimba

Katika sura hii:

 

Katika sura hii:

• Sura ya 15: Utoaji mimba na matatizo yanayotokana na utoaji mimba
• Kwa nini baadhi ya wanawake hutoa mimba?
• Utoaji mimba salama na usiyo salama
• Kufanya uamuzi juu ya kutoa mimba
• Njia salama za utoaji mimba
• Nini cha kutarajia katika utoaji mimba salama?
• Nini cha kutarajia baada ya kutoa mimba?
• Uzazi wa mpango baada ya utoaji mimba
• Matatizo ya kiafya yanayohusiana na utoaji mimba
• Kudhibiti utoaji mimba usiyo salama

Baada ya kutoa mimba unaweza kupata ujauzito tena mara moja – ndani ya wiki 2 hivi. Njia nyingi za uzazi wa mpango huchukua muda kuanza kufanya kazi. Hivyo ongea na mfanyakazi wa afya juu ya uzazi wa mpango na kuanza kutumia njia mojawapo zifuatazo mapema iwezekanavyo.

Kidonge cha majira: Unaweza kuanza kutumia vidonge vya majira siku hiyo hiyo ya kutoa mimba. Usisubiri zaidi ya wiki 1.
	Kitanzi: Kama hakuna hatari ya maambukizi, mfanyakazi wa afya aliyepitia mafunzo anaweza kuingiza na kufunga kitanzi mara baada ya huduma ya utoaji mimba.

Sindano: Sindano ya kwanza inapaswa kutolewa siku hiyo ya utoaji mimba au wiki moja baada ya hapo.
Vijiti (vipandikizi): Vipandikizi vinaweza kuingizwa mwilini muda mfupi kabla au baada ya utoaji mimba, au hadi wiki moja baadaye.

Kuna uwezekano mkubwa kwamba mwanamke au msichana ambaye ametolewa mimba hakutaka kuupata ujauzito huo. Huu ni muda mzuri kumpatia taarifa juu ya njia za uzazi wa mpango na upatikanaji wake.

• Mwanamke kufunga kizazi: Kama ujauzito wako ulikuwa chini ya miezi 3, unaweza kufanyiwa huduma ya kufunga kizazi wakati wa utoaji mimba au mara baada ya hapo. Ni muhimu sana kufikiri kwa makini kabla ya kufikia uamuzi huu. Kufunga kizazi ni hali ya kudumu ambayo inamaanisha kwamba hutaweza kuzaa tena.

• Mwanaume kufunga uzazi: Ufungaji uzazi kwa mwanaume unaweza kufanyika wakati wote na ni hali ya kudumu. Uamuzi huu unahitaji kuufikiria kwa makini.

• Kondom: Wewe na mwenzi wako mnaweza kutumia kondom mara mtakapoamua kufanya ngono tena. Kondom pia hukinga dhidi ya maambukizi kupitia ngono, vikiwemo VVU.

• Dawa za kuua mbegu za kiume: Unaweza kutumia dawa za kuua mbegu za kiume mara utakapofanya ngono tena. Usitumie dawa za kuua mbegu za kiume kama una VVU, au una wenzi wengi.

• Diaframu: Kama hakukuwa na maambukizi au majeraha, unaweza kufungwa diaframu baada ya utoaji mimba.

Kwa taarifa zaidi juu ya njia zote hizi, angalia sura juu ya “Uzazi wa mpango.”

Njia za asili (ute na kuhesabu siku): Njia hizi hazifanyi kazi hadi mzunguko wako wa hedhi ya kila mwezi utakaporudi katika hali yake ya kawaida.

Ukurasa huu ulihuishwa: 04 Mei 2017