Hesperian Health Guides
Sura ya 5: Masuala ya afya yahusuyo wasichana
HealthWiki > Pale ambapo Wanawake hawana Daktari > Sura ya 5: Masuala ya afya yahusuyo wasichana
Kati ya umri wa miaka 10 na 15, mwili wa msichana huanza kukua na kubadilika kuwa mwili wa mtu mzima. Miaka hii inaweza kuwa kipindi cha kusisimua sana lakini pia kipindi kigumu. Mwanamke kijana anaweza kutojisikia kuwa msichana halisi au mwanamke kamili kwani mwili wake bado upo katikati na anafanya mambo mapya ambayo alikuwa hafanyi zamani. Kitakachofanya mambo yawe magumu zaidi ni pale ambapo hakuna mtu anayeyazungumzia mabadiliko hayo na hivyo msichana hajui ni kitu gani atarajie. Sura hii inazungumzia mabadiliko haya, na kuelezea jinsi msichana anaweza kuendelea vizuri kiafya kadri anavyokua, na kutoa elimu ya kumsaidia kuweza kufanya maamuzi sahihi juu ya maisha yenye afya.
Ulaji kwa ajili ya ukuaji wenye afya
Mojawapo ya mambo muhimu ambayo msichana anapaswa kufanya ili kuwa na afya njema ni kula vizuri. Mwili wake unahitaji virutubishi vya kutosha vya protini , vitamini, na madini katika miaka yake ya ukuaji. Msichana anahitaji kimsingi kiasi cha chakula sawa na mvulana. Lishe bora ya kutosha humsaidia kupunguza maradhi, kuleta ufanisi shuleni, kujifungua kwa usalama, na kuwa mwenye afya njema katika umri mkubwa (uzeeni).
Msichana pia anahitaji aina mbalimbali ya vyakula vyenye virutubishi sahihi. Msichana anapoanza kupata hedhi ya kila mwezi, hupoteza damu kila mwezi. Ili kuepuka kupata upungufu wa damu, msichana atahitaji kufidia damu inayopotea kwa kula vizuri vyakula vyenye madini ya chuma. Pia wasichana na wanawake huhitaji kula vyakula vyenye madini ya kalsiamu ili kusaidia kuimarisha mifupa yao.