Iwapo unahitaji kwenda hospitali

Kama utakiwa kufanyiwa upasuaji au ikiwa una tatizo kubwa, kwanza chunguza iwapo unaweza kutibiwa bila ya kulazwa hospitalini. Iwapo hospitali ndio mahali pekee unapoweza kupata huduma unayohitaji, ushauri ufuatao unaweza kusaidia:

Mtafute mtu wa kukusindikiza ambaye atakusaidia kupata huduma unayohitaji na pia kukusaidia kufanya maamuzi.

Wakati mwingine, upasuaji hufanyika bila ulazima, au pale ambapo mgonjwa angeweza kupewa dawa kwa ajili ya tatizo hilo hilo. Pata ushauri mwingine wa kidaktari kama huna uhakika.

Watu tofauti wanaweza kukuchunguza. Kila mmoja anapaswa kuandika matokeo au taarifa zake kwenye kadi ambayo unapaswa kubaki nayo. Kwa njia hii anayefuatia kukuhudumia ataweza kujua ni kipi kimekwisha fanyika juu yako.
Kabla mtu yeyote hajaanza kukuchunguza au kukutibu, ni muhimu sana kuliza ni nini wanachokwenda kufanya na kwa sababu gani. Kwa njia hii unaweza kuamua kama unataka waendelee na kusaidia kuzuia makosa yasitokee.
Jaribu kujenga urafiki na wafanyakazi wa hospitali. Wanaweza kukusaidia kupata huduma nzuri.
Kama unapaswa kupata aina fulani ya upasuaji, uliza iwapo inawezekana sindano ya ganzi kuchomwa eneo lile husika tu ili kuzuia maumivu. Ni salama zaidi na utapata unafuu haraka kuliko kupewa dawa itakayokulaza kwa kipindi chote cha operesheni.
Uliza kujua dawa gani unapewa na kwa nini.
Wakati wa kuondoka omba upewe nakala ya ripoti yako ya matibabu.

Aina za upasuaji au operesheni za kawaida kwa wanawake

Wakati mwingine upasuaji ndio njia pekee katika kutatua tatizo kubwa la kiafya. Wakati wa upasuaji mara nyingi daktari hukata sehemu ya ngozi ili kutatua tatizo lililoko ndani ya mwili au kurekebisha utendaji wa sehemu husika. Zifuatazo ni aina tofauti za upasuaji wa kawaida kwa wanawake:

Kusafisha kizazi aidha kwa njia ya kukwangua au kufyonza. Wakati mwingine utando wa ndani ya kizazi hutakiwa kuondolewa –aidha baada ya kutoa mimba au mimba kuharibika, au kutafuta chanzo cha tatizo la kutokwa damu ukeni.
Kujifungua kwa upasuaji. Pale inapoamuliwa kuwa hali halisi ni hatarishi kwa mama na mtoto iwapo atapita katika mchakato wa kawaida wa uchungu wa uzazi na tendo la kujifungua kwa njia ya kawaida, mama hufanyiwa upasuaji sehemu ya tumbo lake na mtoto kutolewa salama. Upasuaji kwa ajili ya kujifungua huwa unahitajika, lakini wakati mwingine hufanyika si kwa faida ya mama bali kwa faida ya madaktari kujitajirisha. Angalia sura juu ya Ujauzito.
Kufunga uzazi. Katika upasuaji huu, mirija ya mama hukatwa na kufungwa kwenye ncha. Hii huzuia mayai kufika kwenye mji wa mimba ya uzazi na hivyo mbegu za mwanaume haziwezi kurutubisha yai la mama kutengeneza mimba.
Kuondoa kizazi. Kuondoa kizazi ni operesheni kubwa na nyeti na hivyo inapaswa kufanyika tu pale ambapo hakuna njia nyingine mbadala. Ulizia kama inawezekana kuacha mifuko yako ya mayai bila kuondolewa.

Kuongezewa damu

Mtu anaweza kuongezwa damu wakati wa dharura tu ili kuokoa maisha yake, baada ya kupoteza damu nyingi. Lakini kama damu haijapimwa vizuri, inaweza kuwa imebeba magonjwa kama vile homa ya ini (hepatitis) au VVU, ambavyo huenezwa kupitia damu. Hivyo epuka kuongezewa damu, kama siyo kwa ajili ya kusalimisha maisha au kuepusha kifo.

Kama ni lazima ufanyiwe operesheni ambapo tayari una taarifa kuhusu jambo hilo, angalia uwezekano wa kutolewa damu yako mwenyewe mapema na kuhifadhiwa hospitalini. Hatimaye ikiwa utaihitaji basi utaweza kurudishiwa damu yako mwenyewe. Kama haitawezekana damu yako mwenyewe kuhifadhiwa hospitalini, mwombe rafiki au ndugu yako akusindikize hospitalini. Hakikisha kwamba amepimwa hivi karibuni kwa ajili ya homa ya ini(hepatitis) na VVU, na kwamba yeye au mwenzi wake hajafanya ngono na mwenzi mpya ndani ya miezi 3 iliyopita. Damu yake pia inapaswa kuchunguzwa ili kuona kama itaweza kufanya kazi katika mwili wako.

Kama utalazimika kupokea damu kutoka kwa mtu usiyemfahamu na endapo hospitali haikupima damu yake kuchunguza iwapo ina VVU, kuna hatari ya kupata maambukizo. Baada ya kuongezewa damu hakikisha unafanya ngono salama na mwenzi wako kwa miezi 3, na baada ya hapo pata kipimo cha VVU.

Baada ya kufanyiwa operesheni.

Kuweka mapafu yako salama na kuepusha nimonia, tembea tembea kama unaweza. Ukiwa kitandani, vuta pumzi nzito na jaribu kukaa mara nyingi.

Kabla ya kuondoka hospitalini, uliza:

Nifanye nini ili kulinda usafi wa kidonda?
Nifanye nini juu ya maumivu?
Je, ninapaswa kupumzika kwa muda gani?
Je, ni lini tena ninaweza kushiriki tendo la ngono? Iwapo unajisikia aibu kuzungumzia jambo hili pengine daktari au mfanyakazi wa afya anaweza kuongea na mwenzi wako.
Je, ninapaswa kumuona daktari tena, Kama ndiyo, lini?

Kula vyakula laini vyepesi ambavyo vinaweza kuchakatwa tumboni kwa urahisi.

Pumzika kadri uwezavyo. Ikiwa upo nyumbani, waombe wanafamilia wenzio wakusaidie kufanya kazi zako za kawaida za kila siku. Siku chache utakazotumia kujihudumia na kujitunza zitakusaidia kupata nafuu mapema.

Chukua tahadhari juu ya dalili za maambukizo. Usaha au majimaji ya kinjano, harufu mbaya, homa, ngozi na sehemu karibu na uliokatwa ‘kuwaka moto’ au maumivu zaidi. Mwone mfanyakazi wa afya iwapo utaona dalili mojawapo.

Iwapo operesheni yako ilikuwa maeneo ya tumbo, jaribu kuepuka kukaza au kuvuta eneo lililokatwa. Shikilia eneo hilo kwa uangalifu kwa kitambaa kilichokunjwa vizuri, blanketi au mto kila unapotembea au kukohoa.

←→ ULIOTANGULIA | UNAOFUATA →←

Ukurasa huu ulihuishwa: 05 Feb 2018

Hesperian Health Guides

Iwapo unahitaji kwenda hospitali

Lugha zingine

Aina za upasuaji au operesheni za kawaida kwa wanawake

Kuongezewa damu

Baada ya kufanyiwa operesheni.

QUICK LINKS

CONNECT

ORDERING & INFO

Hesperian Health Guides

Iwapo unahitaji kwenda hospitali

Lugha zingine

Aina za upasuaji au operesheni za kawaida kwa wanawake

Kuongezewa damu

Baada ya kufanyiwa operesheni.

QUICK LINKS

CONNECT

ORDERING & INFO

SOCIAL & CONTACT