Kwa ajili ya matibabu ya kuvu au ukungu

HealthWiki > Toleo Jipya: Mahali Pasipo na Daktari > Sura ya 27: Watoto wachanga na unyonyeshaji > Kwa ajili ya matibabu ya kuvu au ukungu: Watoto wachanga na unyonyeshaji

Watoto Wachanga na Unyonyeshaji: Dawa

• Dawa za antibiotiki (viua vijasumu) hupambana maambukizi
• Matibabu ya macho kwa kutumia antibiotiki (viua vijasumu)
• Kwa ajili ya matibabu ya kuvu au ukungu (maambukizi ya fangasi)
• Kusimamisha uvujaji damu miongoni mwa watoto wachanga

Jentiani ya zambarau, au GV, au methrosaniliamu kloraidi

---

Jentiani ya zambarau au kwa umaarufu wake GV (Gentian violet) ni dawa isiyo ghali kwa ajili ya matibabu ya maambukizi ya fangasi mdomoni, kwenye chuchu za mama ambaye ananyonyesha , ndani ya mikunjo ya ngozi, au kwenye mlango wa uke au ndani ya uke. Dawa hiyo pia hutumika kupambana na maambukizi yanayosababishwa na bakteria kwenye ngozi.

Madhara ya pembeni

Dawa ya Jentiani ya zambarau au GV inaweza kuathiri ngozi na kusababisha vidonda inapotumika mdomoni au ukeni. Simamisha matumizi kama upele au vidonda vitatokea.

Muhimu

Jentiani ya zambarau au GV hugeuza kila kitu kuwa cha zambarau. Hupungua baada ya siku chache lakini inaweza kutia nguo madoa ya kudumu.

Jinsi ya kutumia

Tumia mchanganyiko wa aslimia 0.5 ya methrosaniliamu kloraidi (methylrosanilinium chloride) au jentiani ya zambarau.

Paka kwenye ngozi, mdomoni, au sehemu zinazozunguka via vya uzazi vya nje vya mwanamke mara 2 au 3 kwa siku.
Iwapo maambukizi hayataanza kupona ndani ya siku chache, jaribu dawa nyingine.

Nistatini (Nystatin)

---

Nistatini hufanya kazi vizuri kama tiba ya maambukizi mengi ya aina ya fangasi mdomoni, kwenye chuchu au ngozi au ukeni. Dawa hiyo inakuwa katika mfumo wa majimaji kwa matumizi ya mdomoni, mafuta , poda au unga, au bomba maalum kwa ajili ya kuingiza ukeni.

Madhara ya pembeni

Ngozi inaweza kuanza kuwasha mahali nistatini inapotumika. Jambo hili hujitokeza mara kwa mara. Simamisha matumizi kama utapata upele. Dawa ya nistatini wakati mwingine pia husababisha kuharisha.

Muhimu

Maambukizi ya aina ya fangasi ambayo hayapungui baada ya kutumia nistatini, au ambayo hutoweka na kurudi tena, huenda yakawa dalili ya VVU.

Jinsi ya kutumia

Dawa ya nistatini aina ya majimaji hupatikana katika kipimo cha 100,000 kwa kila mililita (au wakati mwingine kipimo cha 500,000 kwa kila mililita). Watu wengi wanapaswa kutumia kipimo cha 100,000 hadi 200,000, lakini watu wenye VVU wanaweza kuhitaji kiasi kikubwa zaidi kinachofikia 500,000 katika kila dozi.
Kwa mtoto mchanga mwenye ukungu/kuvu mdomoni

Mpe kipimo cha 200,000 ya dawa ya majimaji (miligramu 2, chini ya kijiko cha chai ½), mara 4 kwa siku. Tumia kitambaa kidogo kisafi kusambaza nistatini ndani ya mdomo. Endelea kutoa dawa kwa siku 2 baada ya kuvu/ukungu kutoweka, au ugonjwa unaweza kurudi tena.

Kwa ajili ya mama ambaye ananyonyesha mwenye maambukizi ya kuvu au ukungu kwenye chuchu (muwasho, wekundu,au maumivu)

Weka kipimo cha 100,000 hadi 200,000 cha dawa ya mafuta ya nistatini, poda, au majimaji mara 4 kwa siku.