Vitamini na dawa za kuongeza madini mwilini

HealthWiki > Toleo Jipya: Mahali Pasipo na Daktari > Ujauzito na kujifungua > Vitamini na dawa za kuongeza madini mwilini

Ujauzito na kujifungua: Madawa

 

Ujauzito na kujifungua: Madawa

Chuma, ferasi salfeti, au glukoneti salfeti

---

Ferasi salfeti husaidia sana katika kutibu au kuzuia matukio mengi ya anemia. Tiba kwa kutumia ferasi salfeti kwa njia ya mdomo kawaida huchukua takriban miezi 3.

Madini ya chuma kawaida hufanya kazi vizuri zaidi yanapotumika pamoja na vitamini C (aidha kwa kula matunda na mbogamboga, au kutumia kidoge cha vitamini C).

Madhara ya pembeni

Madini ya chuma mara nyingi huvuruga tumbo na ni bora zaidi kutumia dawa hii na chakula. Pia, yanaweza kusababisha ugumu wa choo au choo kufunga hasa kwa watu wenye umri mkubwa, na kufanya kinyesi kuwa na rangi nyeusi. Angalia ushauri juu ya tumbo kufunga.

Matumizi makubwa ya madini ya chuma yaliyo katika mfumo wa majimaji huyafanya meno kuwa na rangi nyeusi. Unaweza kunywa kwa kutumia mrija na kupiga mswaki baadaye.

Muhimu

Kuwa na uhakika kwamba dozi ni sahihi. Ferasi salfeti ikizidi ni sumu. Usitoe madini ya chuma kwa watu ambao wameathirika kutokana na lishe duni. Subiri hadi afya zao zitakaporudi.

Jinsi ya kutumia

Aina tofauti za madini chuma yamekolezwa kwa viwango tofauti na madini hayo. Kwa mfano, kidonge cha miligramu 300 za ferasi salfeti kina ndani yake miligramu 60 ya chuma. Lakini kidonge cha miligramu 325 cha ferasi glukoneti kina miligramu 36 za chuma. Hivyo soma maelezo kwenye kifungashio cha vidonge, chupa ya dawa ya majimaji (sirapu), au vya dawa zingine za kuongeza madini ya chuma kujua kiwango cha chuma kilichomo ndani.

KUZUIA ANEMIA miongoni mwa akinamama wajawazito

Toa miligramu 300 za ferasi salfeti (miligramu 60 za chuma) kila siku. Madini ya chuma yanapaswa kutumiwa kila siku na wanawake ambao wanatarajia kubeba mimba. Madini ya chuma yakichanganywa na tindikali ya foliki huwa ni bora zaidi, kwa sababu tindikali hii husaidia kuzuia hitilafu za uzazi.

KUTIBU mtu ambaye tayari ana ugonjwa wa anemia

Mpe kiasi hiki mara moja kwa siku, au gawanya katika dozi 2 kama itamvuruga tumbo:

DOZI YA FERASI SALFETI KWA MIAKA
KUNDI LA UMRI	KIASI GANI KWA DOZI	VIDONGE VYA 300 MG VINGAPI	KIASI GANI KWA UJUMLA CHA MADINI YA CHUMA
Chini ya miaka 2	Mg 125 za ferasi salfet	Tumia madini ya chuma yenye mfumo wa majimaji (sirapu) au saga takriban ¼ kidonge cha mg 300 cha ferasi salfeti kwenye maziwa ya mama	Toa kiasi cha kutosha kukidhi mg 25 za chuma
Miaka 2 hadi 12	Mg 300 ya ferasi salfeti	Kidonge 1 cha Mg 300 za ferasi salfeti	Toa kiasi cha kutosha kukidhi Mg 60 za chuma
Zaidi ya miaka 12	Mg 600 za ferasi salfeti	Vidonge 2 vya mg 300 za ferasi salfeti	Toa vya kutosha kukidhi kiwango cha mg120 za madini ya chuma

Asidi ya foliki au foleti

---

Asidi ya foliki ni vitamini muhimu ambayo husaidia ukuaji na afya ya mtoto katik wiki za mwanzo za ujauzito.

Jinsi ya kutumia

Asidi ya foliki na dawa za kuongeza madini ya chuma mwilini zikitolewa kwa mama mjamzito kwa pamoja huwa na matokeo mazuri zaidi kuliko kutoa kila dawa peke yake. Hata zikitolewa pamoja au kila dawa peke yake, dozi inabaki ile ile.

Ni bora zaidi kuanza kutumia asidi ya foliki kabla hujawa mjamzito ili mwili wako uwe na kiwango cha kutosha kukidhi mahitaji ya mtoto katika zile wiki za mwanzo. Endelea kuitumia katika kipindi chote cha miezi 3 ya ujauzito. Mpe mikrogramu 400 hadi 500 kila siku.