Hesperian Health Guides

Hesperian Health Guides

Kwa ajili ya matibabu ya maambukizi ya kuvu au ukungu

HealthWiki > Toleo Jipya: Mahali Pasipo na Daktari > Watoto wachanga na unyonyeshaji > Kwa ajili ya matibabu ya maambukizi ya kuvu au ukungu

Jiivi au methrosaniliamu kloraidi


Jiivi ni dawa isiyo ghali kwa ajili ya matibabu ya maambukizi ya kuvu au ukungu mdomoni, kwenye chuchu za mama ambaye ananyonyesha, ndani ya mkunjo wa ngozi, au kwenye mlango wa uke au ndani ya uke. Dawa hiyo pia hutumika kupambana na maambukizi yanayosababishwa na bakteria kwenye ngozi.

Madhara ya pembeni

Dawa ya Jiivi inaweza kuathiri ngozi na kusababisha vidonda inapotumika mdomoni au ukeni. Simamisha matumizi kama upele au vidonda vitatokea.

Muhimu

Jiivi hugeuza kila kitu kuwa rangi ya zambarau. Hupungua baada ya siku chache lakini inaweza kutia nguo madoa ya kudumu.

Jinsi ya kutumia
Tumia mchanganyiko wa aslimia 0.5 ya Jiivi.
Paka kwenye ngozi, mdomoni, au sehemu zinazozunguka via vya uzazi vya nje vya mwanamke mara 2 au 3 kwa siku.
Iwapo maambukizi hayataanza kupona ndani ya siku chache, jaribu dawa nyingine.

Nistatini (Nystatin)


Nistatini hufanya kazi vizuri kama tiba ya maambukizi mengi ya fangasi mdomoni, kwenye chuchu au ngozi au ukeni. Kwa ajili ya matumizi ya mdomoni, nistatini inakuwa katika mfumo wa majimaji, poda ambayo huchanganywa na maji, au pipi. Kwa ajili ya ngozi, nistatini inakuwa katika mfumo wa losheni au mafuta, matone au poda. Kwa ajili ya maambukizi ya kuvu au ukungu ukeni, nistatini huwa katika mfumo wa vidonge vya kuingiza ukeni au mafuta yanayoingizwa ukeni.

Madhara ya pembeni

Ngozi inaweza kuanza kuwasha mahali nistatini inapotumika. Jambo hili hujitokeza mara kwa mara. Simamisha matumizi kama utapata upele. Dawa ya nistatini wakati mwingine pia husababisha kuharisha.

Muhimu

Maambukizi ya aina ya fangasi ambayo hayapungui baada ya kutumia nistatini, au ambayo hutoweka na kurudi tena, huenda yakawa dalili ya VVU.

Jinsi ya kutumia
Dawa ya nistatini kawaida inakuwa katika kipimo cha uniti 100,000 kwa kila mililita (au wakati mwingine kipimo cha uniti 500,000 kwa kila mililita). Watu wengi wanapaswa kutumia kipimo mililita 1 (uniti 100,000) hadi miligramu 2 (uniti 200,000), mara 4 kwa siku lakini watu walio na VVU wanaweza kuhitaji hadi mililita 5, (uniti 500,000) katika kila dozi.
Kwa mtoto mchanga mwenye ukungu/kuvu mdomoni
Mpe kipimo cha uniti 200,000 ya dawa ya majimaji (miligramu 2, chini ya nusu kijiko cha chai ), mara 4 kwa siku . Tumia kitambaa kidogo kisafi kusambaza nistatini ndani ya mdomo. Endelea kutoa dawa kwa siku 2 baada ya kuvu/ukungu kutoweka, au ugonjwa unaweza kurudi tena.
Kwa ajili ya mama ambaye ananyonyesha mwenye maambukizi ya kuvu au ukungu kwenye chuchu (mwasho, wekundu, au maumivu)
Weka miligramu 1 hadi 2 (uniti 100,000 hadi 200,000) za dawa ya nistatini (mafuta, poda, au majimaji) kwenye chuchu zake mara 4 kwa siku.


sw.hesperian.org